Forum

150649 288,028 total views

THE BAD, THE GOOD A...
 
Share:
Notifications
Clear all

[Solved] THE BAD, THE GOOD AND THE UGLIEST PART OF KUKI NATIONALISM

1 Posts
1 Users
0 Likes
897 Views
Thanggoulien Vaiphei
Posts: 16
Trusted Member
Topic starter
 

1626754945-IMG-20210720-WA0006.jpg

THE BAD, THE GOOD AND THE UGLIEST PART OF KUKI NATIONALISM

Written by Mark Haokip

 

PREFACE
Dr. Pu T Lunkim in Bible eiledoh peh uva, Pathen houna lam’a kikhel na lentah ineiyu hi athupi pen ahitai. Aban’a Kuki Country/ Kuki political rights ana lhangsap a, athu ahinsah jing’a; gam le go kivaipoh dan tamtah ana suhtup jong thupi tah khat ahi. Chule Human rights aphudoh a ichan ham a Kukite thu seina ana manchah a kukite rights ana dinpi aumin, gal le tola min eibol nathu u ana dinpin, nam adia hoidoh najong phabep aume. Hiche hohi seiset thei hilou, nam adia atohphat ama thusim a kihejing ding legacy anei ho ahie. Pu T Lunkim hi Pathen in Kuki Nampi adia Thempu khat a ana tun ahin, Israel te khanglai a Samuel atun tobang ahi. Ahin phatbih phabep jouva aman ahin mankhel a, ama dei’a ache phat a Pathen in jong agalvet ahitai. Ahin Pathen thuhing aledoh a mitamtah in Pathen lhagao le thutah hetna aneiya, huhhing na achen jal uva; Pathen longlou lungset najaal a amintheng khosah najala ahinkho ahoibit peh ahi. Pathen thilgon dan hi ivet leh ama khang’a kona hi Kukite mithadoh kipatna leh Politics a chedan hung kitona nadia ana manchah ahin, hijong le gam le politics langa hi Pathen in thao anulou dan hinte. Chule Nam adia aboldoh thilpha tamtah simseng lou abol doh jong umding ahin, hiho chu kisei joukei hih jongle mijousen ahet sohkei ahi. Anoi a kahin sei ding hohi ken jong kasei nom lou hiel, seilou dinga kaum jeh a kanat lolo phat a kahin seidoh ahin; aman jong kei chunga lhaset nan ana sang hih hen. Imajouse abola Pakai ahi jeh in, kigel phat na leh Pathen dei a chephat ding joh ana gel maita hen. Akisei ding hohi mitamtah in amuphah lou, agel phah lou leh atahsan phah lou, aginchat phah lou thu jeng hiding ahi. Kahin sei doh hohi keima experience ho bou ahin, Pathen in hetkhen na eipeh a kihedoh ho bou kahin sei ding ahi. Thutah kitihi mihem in Pathen pang louva kiseidoh theilou, chule kihedoh theilou ahi.

1. Phungkhai politics ahin bola Pathen semlou phung kisemthu Khongsai abol, Khongsai interest a Kuki Innpi amanchah a nam chunga adih louva vai abol. Chuleh phung tamtah Khongsai mina avuimang hi Pathen in ajah nom lou beh thil ahin, phung tamtah unique identity avuimang na ahin khonung leh hungboi diu ahi.

2. Haosa ho thanei na hijack abol’a Kuki Innpi mina achesah, Kuki Innpi la International recognized political Institution hilou; gam le go thu seina thei hilou. National & International government in political langa amel hetlou hikit ahi.

3. Phung politics bolna Tribe politics Instrument a amanchah a, Kuki definition ama deidan a akisem doh a, linguistic issue jong ama deidan a translate akibol doh a amanchah got a, Thadou Tribe toh kidehto na meimei a nam asuset doh got ahi. India Burma noi a neo-colonise ihi masang’un British administration noi a chom khat ina um un, chulai chun linguistic survey anabol un ahile nation khat a het ihi jehu vin Thado kuki pao tho chu Kuki tribe jouse paova anajao sohkei jeh a hiche hi akitho leh paodang tho jousen jong ahethei un hiche hi a national language u hung hiding ahi, ti ana het jeh uva Kuki language tia ahin identified uva, eiho langa vaibol ding ho chun hiche pao chu Shillonga ana jil jiuva, competition jong ana bol jiu ahi. Hiche abollo nau chu adeh a, British ten adalhah teng leu Kukite hin nikhat independent ahin mu uva chuting national language a ahin manchah diu ahi ti ahet jeh uva ana bolu ahin, hichu Dr. Pu’n translate ahin bola Indian Schedule tribe noi a political identity hilou Kuki kiti tribe khat AKT minpua(Modified) recognised kibol nadia apao min dia asuhto got pai jeh a boi ahi. Ajeh chu Pao kitihi independent jou phat le bou kiseitoh ding ahin, tuhi asei phat jong hilou apohdoh phat jong hilou ahi. Hiche ST Kuki chu British Kuki dana agel uva ajop lou jouse hopeless dana akoi uhi achekhel nau ahi. Thadou pomlou jeh a AKT chu by default a clan based a Certificate lah na akinei le asetna umlou ahin, boundary kalval a apply abol jeh uva conflict hidoh ahi. 1951 Any Kuki Tribes chu ahile Linguistic survey model ahin tua Manipur a 22 Tribe kiti jouse hi sub-tribe category a ana umcheh ahi. Ahin 2003 AKT vang clan based ahin, AKT lhem ahi. AKT revived akibol e atia sub-tribe based a chelouv’a clan based a achesah hi ajung jong umthei lou, aleh jong umthei lou ahi.

4. Anglo Kuki war kiti Kuki’ten British toh gaalpi kisat na huhbit louva athisah a apan hi Naga hon igamu lahpeh nadia ethnic cleansing campaign eibol denu toh anatdan kibang ahi. Ning kum lai chun khatvei kana sei tan, kathusei chu Pu Sominthang Doungel in jong nasei dihchat e, adihchat naseidoh ahi, tin inbox a message ahin thot in ahi.

5. Kum tamtah Mizo ho Kuki dia anajol’a ajolou, 2018 kuma dangka 20K apohdoh a kei Aizawl a kana chea ZoRO lamkai political wing hotoh kahung kihouva, Kuki mina movement bolkhom dia convinced ahung ki boldoh ahie. Ahin ama boldoh ahilou phat a, kumpipa Pa Thangkhosei toh kitho lhon’a anasuset hon, tuchan a Mizo ho kachunga lungdam nailou ahi. Mihon “ipi nasei a Mizo ho chu nathujo ham?” tia eidoh leu, Pu T Lunkim in seiding eihil a, eihil banga kasei a leh hung nomu ahi nati ding ahi tia eiseipih ahi. Kenjong hichu min tahsan ponte hepu, ajeh chu ijatvei ham nang navaikon a najolou ahin, koiman atahsan lou ding ahi. Mizo hojong nomlou ahin; Pu T Lunkim holoi na convice a’hile akhohpon, ama sol nahile kanop lou diu ahibouve atiuve, katipeh le lung nommo ahi.

6. Adihlou khat chu Independent kimu lou lai, ama lamkai na India, Burma(Myanmar) le Bangladesh noi a Neo-colonialism akon independent kimudoh hile phading ahin, independent deldoh masa louva Father of Kuki Nation akimalah, hohi dihlou ahi. Min pehding ti jongle nom lou ding ahi nalai e. Father of Nation kiti title hi nam khat in independent amuteng independent muna dia lamkai a pang penpen chu kipe joh ahi. Kuki sunga lamkai ho tohdoh dia kisaboi louv’a, credit a aboi jiu hi nam natoh a kisim theilou ahi.

7. Father of Kuki nation hi Anglo-Kuki war a British hole Kuki ho aki surrender umlouva amoh ngah nung uva British hon surrender kibol lou kuki ho amohmat uva jail a akoi uva agamu toupha dia abol ule adihlou jeh a amat hou Kuki hon technical a gaal ajo’a aumdoh jouva ahi. Hilai ahi Naam pipa (father of the nation) chu Pu Chengjapao Doungel, Aisan pa ana changsa ahitai. Ahin British hon ahetlou kah uva gaal alel jeh uva thangtom behseh uva India le Burma administration noi a sohtang (Neo-colonized) dia eikoidoh kit nung uva, hiche Neo-colonize akon kukite apuidoh jouva chamlhat na mun alhut joule hiche father of the nation Title chu chang thei ding bou ahi. Ape hon ahet hih uva amoh peh peh u ahin, chuti ding hilou ahi. Father of the nation title kitihi nop nop a kipeh thei hilou or kilah thei hilou ahi. Hiche Phung lah a upapen hina ding le Naampi Pa title adei jeh leh phung jouse lah a upapen Lunkim phung hisah ding agot jeh a Aisan pa upat na le historical legacy ho atha ngai ahi. Hichi point ahi jeh a C. Aisan kiti Aisanpa kho a Anglo Kuki war het jingna ding’a kibol chu asuhset a athisah ngai ahi. Hiche lolhin nadia chu Naga hole Meilhei(Meetei) hoa kon objection ahung doh ngai kit ahi. Hichea kona chu British recognized Kuki political identity chu tha nadia historical legacy chu tha ngai ahi, achuti jeh a ‘dignity’ le ‘rising’ kiti thucheng chu hungpot doh thei a, history dihtah le political rights toh political identity chu thadoh a uma chua kon Schedule Tribe noi’a kisemthu Kuki alhempa chu ahung dingdoh a, ama mimal policy chunga kiseipa khu guilhun sah ding ti atup ahi. Hiche hi miching mithem tamtah in amuphah lou duha thuh tah manga asem ahi. Ahin lah hichu Pathen in adeipon aphallou jeh a eimudoh sah a kahin seidoh ahi. Hiche jeh a chu Naga hole Meilhei hon Anglo-Kuki War 1917-1919 Centenary man ding chu ahin jahdauva objection ahinbol uva, hiche dungjui a chu Manipur govt leh KIM hon negotiation ahin bol uva thucheng Meilhei holeh Naga ho deidan a kheldoh nadia KIM hon amaho thujo ding cha cha akou uva hunam a kisen toh thoa anopsah uva, ahin khel uleh SoO a um thingnoi hon ahin jahdauva thal ahin lhauva abangloi in KIM lamkai ho tha dia ahin gih uleh hiva chu KIM lamkai ho chu CM koma kisol lut a CM in SoO a um ho ahin gih a operation bolkhum’a suhmang a matchai diuva ahin gih leh hichea pat a chu UG ho hung kichauva amaho joh in mipi lung hang ho’a kona KIM lamkai ho chun ahin le huh kit u ahi. Hiche kipat a thil jouse hungche sesoh ahi. Anglo-Kuki War 1917-1919 song kiphut mangcha history akitha phat a political demand abol lai ujong atha tha ahi. Hiche thu themkhat ning kum lai a social media kahin sei chun Kuki Innpi VP Pu Sominthang Doungel in jong naseidih chat e, hiche jeh a chu imajouse boilo ahitai tia message a kipathu eihin thot ahi. KIM lamkai ho dihlou na chu mipi da na jong avet diu, naam adia aseding ahet nasauva abolpai pau chu dihlou ahi. Nam adia aseding ahile ama ho nomlou diu ahin anop tah jeh uva amahohi them mo chang ahitauve.

Dr Pu(_Aka Tehsepu_) mastermind a kibol ahi dan proof nina chu mipi KIM chunga alunghan a akitom jing lai chun Pute Khongsai a kiloikhom sunga kon atamjo alunghang un nasatah in Kuki Inpi ho natoh dihlou dem lah a chun apang un, hiche phat chun tehse pun Khongsai Student Organisation lamkai ho ana kou in, tunia pat Khongsai chanu/chapa koi hileh Kuki Innpi dem talou din ikitem uve, adem teitei aumleh aman mo akipoh ding ahi. Kuki Inpi eihon idinpi joh diu ahi, tin Press Release guhthim chan ana sohdoh sah un ahi. Hiche akon chun ajing langa pat Kuki Innpi dem ho sese chun, ahi dan danin Kuki Innpi nadem uve’ ti thucheng mangin adihlou henasa san ahin dinpi kit tauvin ahi. Dr Pu hi anung jui mitamtah in abol atoh le atup asei abol ho ahet phah lou a, blind faith a ajui’u ahi. Abolphat phabep ho jeh a dih ding ham tia amoh juijui u ahin, tunia hi Naampi genthei na tulai tah a ithoh lel jouseu jong ahung kondoh na hiche kipat na chu imajouse set hung kipan ahi. Hiche abol jeh a chu Upat hina le naampi pa hina dia India constitutional provision noi a kibol schedule tribe noi a Kuki athah khat semdoh a hiche mina chu legacy chu coup boldoh a, hiche Cloned Kuki (Kuki limkhat kisemthu) akona chu history thah khat semdoh a Khongsai a um sese chu majority hiding, amahon Kuki chu avaipoh diu tihi ahi. Lunkim phung hi upapen alenpen a tun ding, anoichat a Khongsai koi ding, khongsai noi a Kuki umsah ding tihi ahi. Hitabang hohi Pathen in adeimong nadem? Hitobang hohi Pathen Thaonu ho natoh dan ahipoi. Pathen alung han jeh a ajumso nom hiding ahin, Dr. Pu hin masanga chu Naga hotoh kiguh jop na jong anei hiding dan ahi, seiding in akilang tha e.

8. Haosa thu nasatah aseiya, ipi kilo leh akitup thei dem atia kakihou honna, hitia semphat ding ahi kanati ahi. Malai a Haosa Innpi ahina political institution ahina banga chu nung dindoh sah ding angai e. Haosa ho kou khoma kihouna bol ding, chuteng itobang a semding ham tichu gel khom angai e tin kadonbut in aman jong pha asalheh in ahi. Lhakhat jou a kakimuto nauva haosa ho nakhoptup hitam? Ibola tuchan nabol lou ham atin alung hang in, hijeh chun haosa ho awareness ahung kibol in ahung kikhom pan tauvin, ahile Kuki Chiefs Council kiti khu hung potdoh ahi. Hin lah tun ama adou ho tosot in apang kittan, akalelen apangin ahi. Ama lungtup toh molso nading bou agel jeh in Kuki Innpi athuthu a apeithei nadin freehand apen, ama deidei in thu atolsah in ahi. Tun Kuki Innpi itiu Inpi thupi tah hi Fake Kuki kitipen, Schedule Tribe Kuki Innpi dan chun aum doh tan ahi.

Conclusion: Kuki Nam hi melma hon asuset ahipon, eimahon ikisuset u ahi. Hetlou jeh a ikisuset nau sanga henasa ikisuset u tamjo ahi. Nam le gam venbit nading’a natoh a pan lah sanga leadership dam nading leh bitna dia ipan lah nau sang jo kha ahi. Hiche hin nampi asuset nasalheh e. Tunia mimasa hon eida lhah peh’u legacy hohi ivet hoisel leh gaam le naam ading kimudoh behseh lou ahin gam le nam lampang hi fill-up louva atamjo blank a um nalai ahin, koi in a fill-up ding hitam? Genthei naleh dipdam na tailou ipi eidalhah peh uvam? Tun jong Behiang, Henglep leh Lungthulen/Parbung lhanga Meilhei thingnoi hon camp akisem uva apansah nadiuva nopna soi guhthima ana kaipeh jong aum mantan, hitobang hohi nam natoh hilou ahi. Ahin achaina kasei nom chu, thisan longa naam leh gam ihuh lou diu, thisan longa nam isemphat lou diu, Pathen thahat vanga bou ikisem doh nadiu lampi bou kihong ahi. Pathen sol hilou mihem hina ama kipedoh a bol jouse machal theilou ding ahi. Hiche kahin sut jeh a mitamtah alunghan uva athangtom diu jong kahe’e, ahin lah keidia seilou thei ahipoi. Kuki naam politics lam’a amoh chekhel naji hi Kuki Political Ideology dihtah ihetdoh lou jeh u ahi. Hiche jeh a naampi adia politics bolsun chekhel uva, alampiu abin phat le hungkile jiuva gamtin bollou ding abol uva kilepmang na le kiselmang na anei jiu ahi. Ajeh chu Pathen in hichedia chu atun mong mong ahilou jeh ule apoimona dola amanchah maimai u ahi jeh ahi. Pathen in igam le inaam uva dia atun mong mong le thao anu mong mong hi Kukite dia ngaicha ahitan, mipin taona ithum diu hi poimo ahitai. Keiho khangthah phabep holoi hi ikisuh thou nadiu le ichetoh nadiuva apoimo part khat le ni fill-up dia eimanchah maimai ubou ahin, nam le gam hin huhdoh ding le hin lamkai ding Pathen thaonu mong mong ipoimo u ahitai.

 
 
Posted : 20/07/2021 4:17 am
Share: