OPEN LETTER TO COMMUNAL PHUNGLITICIANS & PHUNGKHAI THINKER HO

150649 131 total views


Thukisei jeh in nuija hih un kasopite, Kuki nahi a nam ngailu nahitah beh leh khat sottum bolda un, Thutah jui un, sihnei langnei bolda un, engset papset bolda un, mi kinah nathei le tato nathei in pan la hih un, panpitum neida un, kisetsona thei thu sei hih un, phungin communal hih un, kuki nam natoh chu nang ho phunga dia semtil apat reserved sa bangin gel hih un, phunga communal mindset nei phat ahitapoi communal tah a phunga kihuitup na dihlou bolchan hung vangse ding ahi.

Namthu seithei naleh tohthei na hi Pathen akon ahi ti he un, Pathen deiya nachon uleh nangho insung mama kon Pathen in nam lamkai apeh son kitding ahi, ahin naumchanu Pathen doumah ahile na inheng nasopi ho apieh doh kit ding ahi, ajeh chu nam thudol a lamkai na hi Pathen in alhendoh ji ahin mihem lhendoh thei ahipoi ti heuvin.

Nampi khat kihuhdoh nading mong mong Pathen in agon ji ahin mihem semthu thei ahipon ama chu Pathen in alhonpia alamkai ji ahiti he unlang achanga natonga thusei ahipoi ti hethem un, adoukha ho jong dingsot ngeilou ahi.

I pu teniu jong Pathen in inam adia ahin manchah a ahin tundoh ahin kukite jousea dinga eihin tunpieh u ahi hon in nangho phung kineitum sah hih un, nangho ding bouseh a Pathen in thao anu ahipon, nangho phung in natinhem uva nasopi ho nadei dei a nakhut nadiuva Pathen in ahin tun hon ahipon, Kukite jouse dia thao anu hon ahiti heuvin.

Phung lamkai sodoh go hih un, nangho nakineitum sah uva ahile nangho phunga dia bou lamkai dia nakisemdoh gotu tina ahin chuti ahiding thou2 leh Kuki namthu sei tahih un, naphungu kiboipi unlang, Kuki nam thua kikumda jengun.

Phungkhat leilei in kuki nampi represent abolthei ahipoi ti he un. Kuki sunga phung jouse akigop teng Kuki chu nam thalhing khat sohdoh ahi. Keiho phung bou bou in namna katong uve or katohdiu ahi tia nakitum lah diuva Pathen in thao anu uh ahipoi. Hitobang lunggel dihlou pua lamkai hohi aphung aphungin japi hetlouva nathim jut jut jiule najutset gam uva chekhel gam jiu ahi.

Keivang Pathen in nam adia amani banga eitun hileh sotlai peh a thih tengola jep jang thei kajep jang ding khut a hejang thei kahejang ding, thua suhdih thei kasuh dih ding phung le chang communal politics hi namsung le Kuki gam sunga kona kana jep doh ding, phung le chang le tribe a kihuitumna umlouva nampi kilungtoh tah a kaumsah ding ahitai. Nam lamkai kiti chu apansah pa Pakai in apansah natoh kitoh a na atoh ngai ahi.

Nam lamkai kitihi Pathen akon pieng doh ahin phunga kuon piengdoh ahipon, phungkhat chu ngense nachuom kipetum ahilou jeh in chingthei un, abolpa ahisah pa Pakai thu thu ahibouve.

Pathen in inama adia amanchah na nang hon communal tah a nakilahtumu chu Pathen douna ahilam nahet louvu ham?

Keima nasopiu,
naphe navou uh le
Nathisan kibahpiu,

Mark Haokip
Dated: 31st July 2019
Molnom, Ccpur

Leave a Reply

Your email address will not be published.